Една третина од потрошувачите во Македонија користат паметни телефони при плаќање. Овој голем потенцијал за раст на употребата на дигитални паричници го покажа регионалното истражување на Visa.  Според ова истражување, главните причини за користење на мобилно плаќање се погодноста, без ризик од губење на паричникот и брзината. Додека кај еден дел мобилното плаќање произлегло поради кризата со ковид 19. И секако личното искуство со опциите за плаќање е клучен двигател за усвојување нови методи.

Една третина од потрошувачите во Македонија користат паметни телефони при плаќање

 Брзо и безбедно плаќање

– Над една третина од потрошувачите во Македонија користат паметни телефони за плаќање и извршување на трансакции. Додека 61 процент од сите испитаници се заинтересирани да ја користат оваа опција за плаќање во иднина. Регионалното истражување спроведено од Visa покажува зголемена свест кај граѓаните од Македонија за потребата од примена на современи технологии. А, открива и значителен простор за подобрување на прифаќањето на иновативни опции за бесконтактни плаќања од страна на трговците.

Една четвртина од испитаниците започнале да ги користат паметните телефони за плаќање за време на пандемијата. Исто така, 84 проценти од анкетираните наведоа дека нивното лично искуство со различни начини на плаќање е клучен двигател за нивниот избор на начин на плаќање. Повеќето од учесниците во истражувањето ја наведуваат практичноста (56 проценти), без ризик за губење на паричникот (47 проценти) и брзината (41 процент), како најголеми придобивки од плаќањата преку мобилен телефон.

Половина од испитаниците веруваат дека користењето на паметен телефон како начин на плаќање е безбедно. Сепак, скоро третина од потрошувачите изјавиле дека недостатокот на прифаќање на технологијата е неповолна положба, што укажува на ограничен број места каде што се можни такви плаќања.

Преку телефон најплаќани, месечните сметки и паркингот

На прашањето да ги наведат сите добра и услуги за кои испитаниците се подготвени да платат со своите паметни телефони, месечните сметки се на врвот на списокот (67 проценти). Потоа следуваат услугите за паркирање (61 процент). На трето место се плаќањата во продавници, кафулиња и ресторани (52 проценти). Па, билети за театар, кино и јавен превоз веднаш зад нив (50 проценти). Следни на ред се нарачката на храна (49 проценти), како и туристичките аранжмани за патувања и мебелот (43 проценти).

Една третина од испитаниците во истражувањето би користеле мобилно плаќање при купување на автомобил.

„Ние веруваме дека мобилните плаќања наскоро ќе станат дел од секојдневната рутина на сите во ЈИЕ регион. Бидејќи тие нудат погодност, брзина и безбедност заради иновативните методи за проверка преку отпечатоци од прст и лична идентификација.

За прифаќање на новите технолошки решенија е потребно време, но мобилните плаќања треба да се гледаат како нова форма што ќе овозможува технолошки развој слично како и без -контактните картички на почетокот кога беа воведени. Со оглед на запознаеноста и употребата на без-контактна технологија во сите земји од регионот, сметаме дека прифаќањето на мобилни плаќања може да дојде со уште поголема брзина“, изјави Владимир Ѓорѓевиќ, генерален менаџер на Visa за Југоисточна Европа.

 Во регионот

Кога станува збор за регионот, Црна Гора, Србија и Босна и Херцеговина бележат добри резултати. Имено, околу една четвртина од корисниците преферираат да плаќат со своите паметни телефони. Во Албанија, само 10 проценти ја користат оваа опција за плаќање.

И покрај различните навики, според резултатите од истражувањето, клиентите од регионот покажуваат подготвеност да прифатат современи технологии. А, сакаат и да ги тестираат новите карактеристики што ги нудат паметните телефони.

 

 

 

 

 

 

 

Leave a Comment

You must be logged in to post a comment.