Македонија ќе формира национална стратегија за вештачка интелигенција. Ова е еден од заклучоците што произлегоа од денешниот #FITRClassroom организиран од страна на ФИТР. „Предизвици и можности со кои се соочуваат иновативните компании од областа на вештачка интелигенција во Македонија“ беше темата на овој последен  #FITRClassroom.

Македонија ќе формира национална стратегија за вештачка интелигенција

ФИТР двигател на промените во општеството

Свои размислувања и искуства на темата презентираа претставници на компании кои со поддршка од ФИТР успеаа да развијат успешни проекти од оваа индустрија: Светлана Кордумова Трајанова-Pixyle.ai, Христијан Ѓорески од Aidea Lab, Нино Карас од Codewell unlimited, Дашмир Истрефи од Hoyo Tech и Александар Савески од компанијата Si-mAInd. За време на настанот свое обраќање имаше и Вицепремиерот  задолжен за економски прашања, координација на економските ресори и инвестиции.

Според него, ФИТР ќе продолжи да биде двигател на промените во општеството. А, тој лично ќе иницира во Владата да се креира работна група која ќе ја подготви Националната стратегија за вештачка интелигенција,а која ФИТР институционално ќе ја предводи. Според Вицепремиерот таа потоа ќе влезе и во големата слика за развојот на државата, а тоа е Националната развојна стратегија 2021-2041.

 

Иницијативата за креирање на Национална стратегија за вештачка интелигенција претставува почеток на заложбите на Владата и ФИТР која ќе овозможи дигитална трансформација на целата индустрија. Воедно ќе им овозможи на компаниите да ги надминат предизвиците со кои се соочуват и ќе создаде можности за развој на вештачката интелигенција од страна на компаниите.

Индустрија со голем потенцијал

„Оваа индустрија има голем потенцијал за развој во нашата земја. Но, сепак факт е дека на компаниите им се потребни огромни финансиски средства за да започнат.

Со креирањето на Национална стратегија за вештачка интелигенција, ќе им дадеме шанса на многу иновативни стартап компании да ги реализираат своите идеи и проекти. Бројката од шест компании од областа на вештачка интелигенција кои се поддржани од ФИТР, во износ од 441.737 евра, се надевам дека во иднина ќе прерасне во многу поголема бројка на иновативни компании кои сме ги поддржале”, истакна Коста Петров, директор на Фонд за иновации и технолошки развој.

Пристапот до дата центри, потребата од соодветно образование како и потребата од моќна опрема се главните предизвици со кои се соочуваат компаниите кои развиваат иновации базирани на вештачка интелигенција, истакнаа претставниците. Сепак, сите се сложни дека донесувањето на Национална стратегија за вештачка интелигенција ќе им донесе многу придобивки. И тоа не само ним, како компании кои веќе развиваат иновации, но и за сите кои сакаат да започнат да развиваат во оваа насока.

Предизвици и успешни примери

На истото се надоврзаа и Светлана Кордумова Трајанова, од компанијата Pixyle.ai и Дашмир Истрефи од Hoyo Tech кои истакнаа дека раните успеси на ова поле се се уште на почеток. Но тие веруваат дека Македонија има потенцијал да ги следи и применува ваквите иновации и набрзо сите да ги осетат придобивките од оваа револуционерна технологијата

Според Христијан Ѓорески претставник од компанијата Aidea Lab, вештачката интелигенција како следен неизбежен чекор во дигитална револуција, е огромна можност и потенцијал за малите држави, уште повеќе за малите фирми – стартапи. “Можеби звучи контрадикторно, но тоа што се мали, стартапи ги прави флексибилно, прилагодливи, им дава можност да прават “ефтини” грешки. И најбитно од се, им дава можност релативно лесно да тестираат на мал пазар – нови, храбри, револуционерни идеи и со тоа да ја покажат нивната вредност и изводливост” изјави Христијан.

За моќта која ја поседува вештачката интелигенција, зборуваше Александар Савески од компанијата Si-mAInd. Тој го разви проект Мила АИ со кој има можност да ја позиционира Северна Македонија во првите три земји во светот по технолошки развој во сферата на вештачка интелигенција.

„Мила АИ е прва технологија во светот која е способна покрај интелигентни да прави и емоционалини расудувања за околината и тоа го прави 40 пати по ефикасно од моментално најактуелните технологии кои се применуваат во светот”, изјави Александар Савески.

Leave a Comment

You must be logged in to post a comment.