НЛБ Групацијата лани со рекордна добивка од 236,4 милиони евра, што, и без да се земат предвид ефектите од купувањето на белградска Комерцијална банка, значи значително зголемување во однос на претходната година.

НЛБ Групацијата лани со рекордна добивка од 236,4 милиони евра

„Успешниот бизнис донесе рекордно високи профити во 2021 година“, се вели во соопштението на банката.

„Резултатите од работењето на НЛБ Групацијата во 2021 година покажуваат дека ја оставаме епидемијата далеку зад себе и дека што е уште поважно, излегуваме посилни од кога било“, изјави Блаж Бродњак, претседател на Управниот одбор на НЛБ.

Минатата година, заедно со интеграцијата на белградската Комерцијална банка, чие преземање го заврши пред крајот на 2020 година, НЛБ Групацијата постигна и други важни пресвртници. Меѓу нив, банката ги вбројува и успешното спојување на две банки во Црна Гора - НЛБ банка Подгорица и Комерцијална банка Подгорица.

„Надзорниот одбор со задоволство забележува дека Групацијата НЛБ успешно ги искористи можностите што ги нуди поволното економско опкружување со силен раст на БДП во регионот и здрава приватна потрошувачка и побарувачка за кредити“, рече претседателот на Надзорниот одбор на НЛБ, Примож Карпе.

„Деловните резултати на групацијата докажуваат дека нејзините цели се поставени рационално и стратешки, со акцент на иновативни финансиски производи кои овозможуваат поголем и постојан раст на приходите и иновативни дигитални решенија на клучните пазари“, рече тој.

Растот на нето приходите од провизии - „импресивен“


Нето приходите од камати лани се зголемени за 37 отсто на 409,4 милиони евра, во кои Групацијата Комерцијална банка учествувала со 98,5 милиони евра. Без нејзиното влијание, растот изнесувал четири проценти, делумно како резултат на силниот кредитен раст.

Според НЛБ, растот на нето приходите од провизии е „импресивен“ и достигна 39 проценти. Високата побарувачка за инвестициски производи, како што се производи за управување со средства и банкарски осигурителни производи, како и високите приходи од општи деловни активности доведоа до зголемен приход од провизии и надоместоци, објаснуваат тие.

Обемот на кредитите е зголемен за девет отсто, а на депозитите за осум отсто. Депозитите на домаќинствата се зголемени за пет отсто, што покажува дека штедачите дел од заштедите префрлиле на алтернативни инвестиции, велат од НЛБ.

Ослободени се резервации и исправки на вредност за кредитен ризик во нето износ од 35,8 милиони евра.

Во иднина, Групацијата првенствено ќе се фокусира на интензивна дигитализација и обезбедување на најдобро корисничко искуство, како и на одржлив бизнис и развој.