АРЕЛ НЕВРОМАРКЕТИНГ е пионер во примената на методите на невромаркетингот во регионов. Во последно време, во деловниот свет,  се’ повеќе се слуша поимот „невромаркетинг“. Ова означува нов начин на размислуивање и планирање при пласман на производот на пазарот. АРЕЛ НЕВРОМАРКЕТИНГ е пионер во примената на методите на невромаркетингот во комерцијални цели во регионот. Основачот на АРЕЛ НЕВРОМАРКЕТИНГ е Јасна Стоимировска Величков, дипломиран економист на Универзитетот „Оксфорд Брукс“ во Оксфорд (ВБ), на кој ги завршува и магистерските студии по меѓународен менаџмент. Образованието го продолжува на одделот за континуирана едукација на Универзитетот „Оксфорд“, насока психологија.

• Што е „невромаркетинг“?

- Невромаркетинг е иновативна област која користи напредна биометриска технологија и вештачка интелигенција за истажување на несвесните реакции и емоции на купувачите поттикнати од одредена реклама, веб-страница, цена, производ, услуга инт. Компаниите најчесто немаат повратна информација за мислењето за нивниот производ од страна на купувачите, освен за бројот на продадени свои производи. За тоа дали се задоволни уште од првото купување на нивниот производ, исто така,  тие немаат информација. Затоа, поимот за невомаркетингот  кој се повеќе се шири во деловниот свет, полека, но сигурно, стана поле на интерес за сите компании што сакаат да разберат каква улога игра нивниот бренд во животот на купувачите.

Принципите, односно истражувањата на невромаркетингот можат да им послужат на компаниите како инспирација за нови идеи при креирање на маркетинг-кампањи.

Донесување одлуки пред полицата

• Како да се однувуваат купувачите пред толку голем број производи што им се нудат во маркетите?

- Научно е докажано дека донесувањето одлуки пред полиците е импулсивно, и се случува врз основа на меморија и емотивна врска меѓу брендовите и купувачите. Со примената на современи средства, реакцијата на мозокот  се следи со ЕЕГ (електроенцефалографијата). АРЕЛ НЕВРОМАРКЕТИНГ е пионер во употребата на ЕЕГ за комерцијални цели во регионот.

Со поставување на електроди на главата, се мерат електричните имплуси на невроните, а со оглед на тоа дека одредени чувства и емоции се поврзани со конкретни региони во мозокот, денес ЕГГ наоѓа примена и во маркетингот.

Постојат алатки за мерење на електроспроводливоста на кожата, статичен следач на погледот и следач вграден во очилата, ЕМГ, и ЕЦГ. А исто така постои и модул на вешачка интелигенција кој препознава емоции од лицето.

Тоа што еден добро сработен класичен маркетинг можеше да ни го даде досега, го издигнуваме на повиско ниво. Работи што некогаш само сме ги претпоставувале или по интуиција сме верувале дека се вистинити, сега ги мериме прецизно.

• Кои се придобивките од ваквите методи?

- Придобивките од примената на невромаркетингот се очигледни. Се создаваат производи и услуги со додадена вредност за купувачот и се намалува неизвестоста со која се соочуваат компаниите за време на креирање на маркетинг стратегијата.

Иновативноста на производитe е од суштинско значење за една компанија и за нејзината конкурентна предност на пазарот. Целта на новите производи е да обезбедат развој за компанијата и додадена вредност за купувачот. Поради неизвесноста што доаѓа со брзите промени на пазарните трендови, голем број нови производи и услуги не успеваат да се пробијат на целните пазари.

Битката меѓу новите и постојните производи на полиците

• На што укажува искуството при пласирањето на новите производи?

- Најчесто, со потенцирање промотивни пораки, како зборот „ново“, на пакувањата, компаниите се трудат да му го привлечат вниманието на купувачот, надевајќи се дека тој ќе има потреба од овој производ. Од друга страна, мозокот на купувачот има, еден вид селективен филтер и не обрнува внимание на голем дел од пораките, туку најчесто одлуките ги донесува емотивно како последица на старите навики. Тоа однесување е дел од човековата природа. Новитетите го привлекуваат вниманието, но истовремено значат и неизвесност. Тоа е една од причините поради кои не е лесно да се направи нов, алтернативен избор и желбата кон новите производи може брзо да исчезне.

Денес многу компании се потпираат на невромаркетингот како перспективна област која може да им помогне да ја намалат неизвесноста што доаѓа со пласирање нови производи на пазарот. Со помош на електроенцефалографијата (ЕЕГ), магнетната резонанца (МРИ), следачот на поглед и слично, невромаркетингот ја истражува реакцијата на купувачот на одредена маркетинг-порака. Емоциите што произлегуваат од меморијата, сеќавањата и впечатоците за одреден бренд можат да го надминат вкусот или другите карактеристики на производот.

Моќта на брендот

• Дали брендот има моќ, или е тоа само мит?

- Брендовите имаат посебно место во меморијата на купувачите. Овие реномирани брендови при пласман на иновацијата го користат афинитетот кон брендот.

Еден практичен пример е невромаркетиншкото истражување на неврологот Рид Монтаг во 2003 година во Тексас, САД. Со помош на невромаркетиншката техника и употреба на магнетна резонанција тој ја решава долготрајната загатка зошто Coca-Cola доминира на пазарот, и покрај тоа што Pepsi има попопуларен вкус при анонимните тестови.

При следење на мозочната активност на потрошувачите што ги консумирале пијалаците без сознанија за брендовите, половината од нив се изјасниле дека го претпочитаат вкусот на Pepsi. Кај овие потрошувачи се активирал регионот во мозокот наречен „ventral putamen“, кој е поврзан со наградувачко однесување. Одговорите се смениле во однос 3:1 во корист на Coca-Cola кога на потрошувачите им било кажано кој производ го консумираат.

Заклучокот бил дека емоциите што произлегуваат од меморијата, сеќавањата и впечатоците за одреден бренд можат да го надминат вкусот или другите карактеристики на производот. При пласирање нови производи во портфолиото, овие брендови очигледно ќе имаат конкурентна предност на пазарот. Тие ја користат моќта на афинитетот на нивниот бренд, која вклучува предвреме препознатливи елементи.

Невромаркетиншки практики за пласман на нови производи

• Како да се настапи со нов производ?

- Истражувачите на полето на невромаркетингот имаат неколку препораки и за брендовите што се помалку познати или нови на пазарот, со цел да им помогнат на компаниите да создадат подобри производи за купувачите и да заштедат пари при креирање релевантни маркетиншки активности. За компаниите што пласираат бренд на пазарот првпат, се препорачува градење бренд врз основа на веќе познат контекст – истакнување на додадената вредност на производот и придобивките за купувачот. На пример ако некоја компанија планира промоција на нови безглутенски производи, целта би била да се истакнат здравствените придобивки на производот, без да ѝ се наштети на перцепцијата на купувачите за вкусот на производите.

• Придобивки?

- Придобивките од користењето на невромаркетиншките техники и методи при пласман на нови производи се очигледни за двете страни. За купувачите, тоа значи – производи со додадена вредност и транспарентна комуникација, а за компаниите – намален ризик при предвидување на идниот успех на новите производи и значителна заштеда на време и материјални средства. За супермаркетите тоа значи: полни полици при пласирање квалитетни нови производи што ќе бидат успешни и ќе донесат нови приходи.

 

Бране Стефановски