Компаниите од ЕУ нудат пари за да дојдете на интервју за работа. Компаниите од еврозоната станаа толку очајни во потрагата по работници, особено во многу бараните професии како што е ИТ секторот, што воведоа парични бонуси за одредени фази од процесот на селекција. Па нудат 500 евра,ако дојдете на интервју за работа, а преминувањето во вториот круг носи уште 1.000 евра.
Компаниите од ЕУ нудат пари за да дојдете на интервју за работа
Фајненшл тајмс го наведува примерот на Дојче фамилиенверсичерунг, брзорастечка осигурителна компанија чиј основач Стефан Нол смислил досега незамислив начин за привлекување потенцијални работници.
Сите во неволја
Основачот на оваа германска осигурителна компанија им нуди 500 евра на кандидатите чии биографии ги издвојува доколку дојдат на првото интервју за работа. Преминувањето во вториот круг на интервјуа носи уште 1.000 евра, а успешното завршување на шестмесечниот пробен период компанијата Knoll го наградува со дури 5.000 евра.
„Особено е тешко да се најде некој со ИТ вештини. Ние сме во трка со гиганти како Алијанц кои лесно можат да вработат стотици професионалци од целиот свет. Но, ние не сме заинтересирани за работници од, да речеме, Индија, сакаме луѓе од овде, од Франкфурт“, вели Нол.
Неговиот необичен пристап кон вработувањето покажува колку недостигот на работна сила се проширил во Германија, но и во остатокот од Европа.
Недостигот од работници е особено евидентен во ИТ и здравствената индустрија. Недостиг од работници има и во градежната индустрија поради проширувањето на градежната дејност. И на угостителите им е тешко и да најдат работници, пред се поради неизвесната насока на пандемијата, што ги прави овие работни места особено несигурни поради можните нови епидемиолошки мерки.
Но, недостигот од работници е забележлив и во другите сектори. Истражувањето на 9.000 германски компании спроведено од развојната банка KfW и Економскиот институт Ifo покажа дека 43 отсто од нив имаат проблеми со недостиг на квалификувана работна сила. Тоа е највисок удел од обединувањето на Германија во 1990 година.
Во Франција 54 отсто од услужните компании имаат проблеми со вработувањето, што е најмногу од 2000 година. Сепак, земјите од еврозоната сега имаат можност да ја намалат невработеноста, еден од најголемите економски проблеми во областа од претходната криза во 2008 година.
Да потсетиме, по 2008 година, невработеноста во еврозоната се зголемуваше четири години. Сега е на рекордно ниско ниво, паѓајќи на 7,2 отсто во ноември минатата година. Згора на тоа, невработеноста кај младите значително се намалува, паѓајќи на историски ниски 15,5 проценти.
Супер брзо закрепнување
И покрај фактот што поголемиот дел од програмата за зачувување на работните места заврши за време на пандемијата, работници сепак недостигаат. Европската централна банка процени дека во октомври минатата година само 1,8 отсто од работниците во еврозоната биле „на чекање“ поради последиците од пандемијата, во споредба со 20 отсто во април 2020 година.
„Ова беше супербрзо закрепнување на пазарот на труд во Европа. Бројот на вработени ќе продолжи да расте во 2022 година, што ќе ја направи невработеноста рекордно ниска“, вели Катарина Утермел, виш економист во Алијанц.
Иако омикронската варијанта на коронавирусот може делумно да ги расипе оптимистичките прогнози, економистите сепак очекуваат вработеноста да продолжи да расте, поттикната од европскиот план за закрепнување вреден 800 милијарди евра.
За разлика од САД и Обединетото Кралство, во некои европски земји, како Шпанија и Франција, вработеноста ги надмина нивоата пред пандемијата. Во Италија и Германија е многу блиску до тоа ниво. На ниво на цела ЕУ уделот на вработени е на рекордно високо ниво од 73,5 отсто.
Меѓутоа, растот на вработеноста е придружен со подобрени работни услови. На пример, француските работодавци сè повеќе нудат договори на неопределен период, се оддалечуваат од несигурната работа на определено време, вели Филип Мартин, претседател на Независниот совет за економски анализи, кој ја советува тамошната влада.
Шпанија, исто така, има намера да ги намали договорите на определено време, по договорот меѓу работодавачите и синдикатите што допрва треба да биде потврден во парламентот. Но, тамошните економисти велат дека реформите не се доволно амбициозни за да се решат структурните проблеми на шпанскиот пазар на труд.
