Марко Стојановиќ веќе две декади создава реклами за домашните македонски брендови, човек кој со огромното искуство во водечките маркетинг агенции меѓу кои и „New Moment“ и „Devision“ ја постави креативната насока за многу големи компаниски имиња, водејќи ги низ процесот на комуникација и нивното присуство на пазарот.

За идеите во рекламирањето вели дека се валута - колку е подобра идејата, толку ќе биде подобра и кампањата и самата агенција. Но, како се доаѓа до идејата? 

„Идејата произлегува од креативност што сите се обидуваме да ја дефинираме. Целата идеја е дека ти можеш да го систематизираш процесот на создавање идеи. Далеку од тоа дека е лесно. Идеја не е ништо повеќе од нова комбинација од два постоечки елементи. Ако се направи врска и се добива ново значење се добива нова идеја. Тоа во рекламирањето има голема примена, се прави врската меѓу информации за производот што доаѓаат од брифот од клиентот и го контектираш со нешто што го имаш во главата. На пример од прочитани книги, гледани филмови... И правиш релевантна комбинација.  Колку ќе успееме да најдеме конекција меѓу старите елементи и од нив да создадеме нова врска, толку ќе бидеме подобри во создавањето кампања. На луѓето им треба референтна точка за да сфати што сакаме да испратиме како порака. Дали тоа е момент од филм, серија, на кое ќе залепиш конкретно знаење од тоа што сакаш да го продадеш. На крајот се сведува дека рекламирањето е вид на уметност во служба на капитализмот, бидејќи на крајот од денот мораш да го продадеш производот“, вели Стојановиќ. 

Сепак, за изработка на добра реклама, вели Стојановиќ, мора да се има познавање од разни области и човек да е љубопитен по природа. Говорејќи за копирајтингот, пак, посочува дека има различни подгранки. Тие се однесуваат на тоа како да напишете 30 секунди реклама за радио, слоган, начин на размислување текст за брошура, видео реклама. 

„Мора да имаш познавање, да го познаваш тајмингот, да не напишеш нешто што трае три минути, а клиентот има само 30 секунди за телевизија. Некои работи не се исти визуелно како што ги замислуваме во глава. Ние сме имале и лоши кампањи, некогаш по наша вина, некогаш по вина на клиент кој не сакал да попишти за нешто. Мора да се знаат сите работи за производот, да се пишуваат сценарија и дизајни, после некое време да се дистанцираш од проектот и да се дозволи потсвеста да го одработи тоа. Тогаш мозокот доаѓа до решениее кое може да биде добра идеја. Идејата ако помине кај клиентот си најсреќен на свет. Главна мотивација не можат да бидат парите, бидејќи ако не го сакаш тоа, не може да се испорача добар производ“, смета Стојановиќ.  

Како се стигнува до позицијата креативен директор?  

Стојановиќ вели дека на почеток, додека се стигне до позицијата креативен директор, може треба да се поседува одредени вештини. Но, кога веќе се доаѓа до позицијата, потребни се сосема други вештини. 

„Директор треба да менаџира луѓе. Ова е индустрија на его, самодоверба, треба на некому да му кажеш дека не му чини идејата, па да му објасниш. Секогаш мора да се има самодоверба, тоа помага пред настапот кај клиентите. Проблемот настанува ако таа самодоверба ве удри на егото. Ако немаш вистински зборови може една недела соработникот може да помисли дека намерно го саботирате. Тоа е еден друг свет на вештини. Раководењето со 10 луѓе во сектор, тоа што си добар креативец не мора да значи дека ќе бидете добар креативен директор и обратно“, вели Стојановиќ. 

Тој не е поборник на бреинсторминг идеите во тим, сметајќи дека за него лично тие се непродуктивни. Повеќе преферира секој сам да направи посебно истражување со неколку идеи и да се види колку тоа функционира. Бидејќи, како што вели, идејата е субкетивна работа, на еден може да биде генијална , на друг најголема глупост. 

„Понекогаш станува и тешко на некој да му објасниш дека неговата идеја не е добра во тој даден момент. Сепак, предизвиците вариваат од видот на кампањата. Клиентите се луѓе кои имаат поинакви размислувања. имало клиенти каде доволно се разбрани, има такви какви што тераат инает. Ако се согласите дека клиентот е секогаш во право, може да излезе полоша кампања. Понекогаш може да излезе дека клиентот е во право, бидејќи знаел нешто за кое вие не сте знаеле. Ако го кажувате само тоа што тој сака да го слушне, ништо не сте направиле“, заклучува Стојановиќ.