Клучно за развој на државата според Азевски е комуникацијата меѓу приватниот сектор и институциите.
„Време е, да престане лиферувањето значајни економски закони кои тешко се усвојуваат во Собранието поради неговата блокада и наместо тоа, да се донесат оние законски решенија кои стојат по владините фиоки десетина години, а се приоритет за функционирање на бизнисот“, потенцира Азески на владината конференција „Година на нови можности“.
-Соработката со Владата мора да претрпи трансформации во делот на почитувањето на нашите барања кои потекнуваат од реалниот сектор и безпоговорно тврдам дека се од интерес и на бизнисот и на државата, истакна претседателот на Комората.
Тој ги повтори барањата кои Комората ги изнесува подолго време.
-Бараме поголема подготвеност на јавниот сектор, на Владата, во однос на владеење на правото и на почитување на пазарните законитости, посебно на деловите кои се однеусваат на правосудниот систем зашто бизнис заедницата од тоа трпи определени последици.
Бараме и зголемување на квoтите за увоз на работна сила. Нашиот став тука е идентичен со оној на Владата, треба да се зголемат квотите, но да се води сметка и за националните интереси, како и за интересите на бизнисот. Време е, исто така, да престане лиферувањето значајни економски закони кои тешко се усвојуваат во Собранието и тој период да се искористи за да се донесат закони кои стојат во владините фиоки две, три, пет па и десет години, како законот за холдинг, промената на членот 218 од Законот за извршување, законот за акционерските друштва, Иницијативата за промена на Одредбата за утврдување на највисоката плата и највисоката пензија во услови кога плаќаме максимални придонеси. Тоа се суштински закони и треба да добијат приоритет, подвлече Азески.
Тој потсети и дека Комората ја донесе Декларацијата за економските политики и мерки која се совпаѓа, како што рече, со Националната стратегија за развој на Владата годинава. Притоа најави дека ќе се направат напори за успогласување на двата документа.
Пет прашања од бизнисот до Владата
Петте прашања од бизнис заедницата по повод годишната конференција Азески ги испорача до владата и претходно и ги објави во својата колумна, а ние ги пренесуваме во целост.
1. Започнавме со спротивставени мислења околу Законот за работни односи, со кој недела се прогласува за неработен ден. Завршивме на Уставен суд. Во образложението на решението со кое се отфрла нашата иницијатива, а кое, впрочем, го добивме година дена по поднесувањето на иницијативата, Уставниот суд елаборираше дека една од причините е тоа дека здравјето на луѓето е определувачко за да не се прифати иницијативата. На тоа, впрочем, не се повикува ниту законското решение, плус еден куп исклучоци кои покажуваат дека здравјето на тие луѓе не е важно. Зарем ова не и пречи на Владата во градењето правна држава да мора да биде одбранета и со вака нелогични квалификации?!
2. Согласни сме околу барањето да ги зголемиме квотите за увоз на работна сила. Но имаме едно просто прашање: што е со нашите вундеркиндзи кои ги испративме на државна сметка на најпрестижните универзитети, а кои никако да се вратат и да и помогнат на државата. Каде се тие сега и за што се потрошени 150 милиони денари годишно, т. е. 1,5 милијарди денари за 10 години? Па нели заеднички на сите ни е обврската да ги зголемиме продуктивноста и конкурентноста ако сакаме економски развој!? Некој ќе рече дека увозот на работна сила подразбира дреари, тесари, заварувачи, но не е лошо да се провери бројката на издадени дозволи за странски менаџери, а потоа да се објави како стојат работите на овој план.
3. Постои ли во оваа држава поим ОДГОВОРНОСТ за доцнењето на инфраструктурните проекти? Сигурен сум дека во овие изминати 50-ина година потрошените пари за одржување на планинските превои ќе исфинансираа тунели низ целата држава, а да не зборувам за тешкотиите што ги имаат камионџиите кои превезуваат стока за бизнисот и за жртвите и опасностите кои демнеат на секој чекор.
4. Нели се договоривме за даночен календар заради предвидливост на билансите на компаниите?! Ако се договоривме, тогаш треба да го почитуваме тоа. Ние не сме сами за себе, тука имаме и 200 странски компании и многу други странски капитални инвестиции за кои ова е нормална работа.
5. Бидејќи од минатата година почнавме да славиме годишнини, немојте оваа година да прославуваме 12 години од иницијативата за промена на член 218 од Законот за извршување или 10 години од иницијативата за воведување холдинг-друштва или 7 години од иницијативата за зголемување на контролниот праг за преземање акционерски друштва или 5 години од барањето за промена на методологијата за пресметка на придонесите за пензиско-инвалидско осигурување. Донесете ги прво овие закони, па потоа, непочитувајќи го даночниот календар, предлагајте нови закони.
П.С. Имавме и имаме успешни заеднички проекти: зголемување на конкурентноста со ревидирање на царинските стоки; зголемување на финансиската поддршка за компаниите кои инвестираат и кои воведуваат иновации; допрецизирање на листата за непризнавање трошоци за даночни цели на данокот на добивка; овозможување доброволно регистрирање ДДВ во кој било период од годината, како и навремено враќање на ДДВ. Овде може да се споменат и соработката во решавањето на проблемите произлезени од енергетската криза, регионалните иницијативи, како и беспоговорната комуникација на сите нивоа, што значи дека Владата секогаш беше отворена за соработка. Не дека ние не знаеме оти Владата е одговорна за целокупниот живот во државата, но во тоа милје бизнисот мора да има посебно место поради бројките, приходите и поради кохезивноста во своето работење. Владата е наш партнер и овие прашања ги поставуваме најдобронамерно, без никакви калкулации, зашто само во услови на консензус може да се најде излез од кризите и да се постигнат позитивни економски резултати.
