По неколкумесечните тешки преговори, данската влада се договори со фармерите, производителите и еколошките групи да ги оданочува емисиите на метан произведени од домашните животни од 2030 година. Значи сточарите во Данска наскоро ќе плаќаат годишен данок од 90 евра по крава поради штетните емисии кои влијаат на глобалното затоплување и климатските промени. Со тоа практично данската влада прва го воведува данокот на емисии на јаглерод во светот од земјоделството, кој треба да започне во 2030 година. Данска е главен извозник на млечни производи и свинско месо, а земјоделството е најголемиот извор на емисии на јаглерод во земјата.
Целта на коалицискиот договор е да се исполнат климатските цели. „Ќе бидеме првата земја во светот со земјоделски данок за емисиите на јаглерод“, изјави вчера министерот за надворешни работи Ларс Локе Расмусен. Данската млечна индустрија во голема мера го поздрави договорот и неговите цели, но тоа не е случај за некои фармери кои се бесни од одлуката, пишува Си-Ен-ЕН.
Mетанот ја зголемува температурата на планетата
Потегот на данската влада доаѓа само неколку месеци откако фармерите протестираа низ Европа, блокирајќи ги патиштата со трактори и фрлајќи јајца кон Европскиот парламент поради долгиот список на проблеми, вклучително и проблемите за еколошките регулативи и прекумерната бирократија.
Глобалниот систем на храна е главен придонесувач за климатската криза, произведувајќи околу една третина од емисиите на стакленички гасови. Особено големо влијание има сточарството, кое предизвика околу 12 проценти од глобалните емисии во 2015 година. Дел од ова загадување доаѓа од метан, гас што ја затоплува планетата произведен од кравите и некои други животни.
Намалување на емисиите на добиток
Данскиот парламент треба да го одобри данокот подоцна оваа година, а тој треба да стапи на сила во 2030 година. Според првичната проценка данокот на почетокот ќе изнесува 40 евра по тон емисии од добиток, што ќе се зголеми на 750 круни (100 евра) во 2035 година.
Ќе се применува даночно олеснување од 60 проценти, што значи дека на земјоделците ефективно ќе им се наплаќаат 120 круни (16 евра) годишно од 2030 година или 300 круни (40 евра) од 2035 година.
Данските млечни крави испуштаат просечно 5,6 тони еквивалент на CO2 годишно, што значи дека фармерите ќе плаќаат 672 круни или 90 евра по крава според пониската даночна стапка од 120 круни годишно.
Даночните приходи ќе се користат во првите две години за поддршка на зелената транзиција во земјоделската индустрија. Данската група на фармери „Bæredygtigt Landbrug“ вели дека тоа е „застрашувачки експеримент“. „Ова е чиста бирократија. Знаеме дека има климатски проблем, но не веруваме дека овој договор ќе го реши“, рече претседателот Питер Киер.
Неодамна ЕУ размислуваше за сличен данок, но се предомисли по масовните протести на земјоделците.