Научниците ширум светот интензивно работат на помоќни батерии. Се бараат решенија кои не мора да вклучуваат ретки метали како што се кобалт, никел, манган и литиум. Охрабрувачки вести доаѓаат од германските лаборатории, пишува тпортал.

Истражувачкиот кластер по литиум во Улм, Карлсруе и Гисен со 120 научници е најголемиот кластер од ваков вид во Европа. -Батеријата на иднината треба да се заснова на некритични, вообичаени елементи како натриум, магнезиум, калциум или алуминиум, убеден е хемичарот Максимилијан Фихтнер од лабораторијата во Улм.

„Имајќи предвид дека побарувачката рапидно расте, мораме да ја поставиме технологијата на поширока материјална основа за да нема тесни грла во производството“, нагласува Фихтнер.

Натриум-јонската батерија - „златна иднина“

Фокусот е на прашања како што се еколошкиот отпечаток, животниот век, трошоците за производство и ефикасноста на новите технологии. Според Фихтнер, натриум-јонската батерија моментално има најголема шанса за „златна иднина“. Речиси е моќна како литиум-јонска батерија, вели тој, но е подобра во други области.

„Натриум-јонската батерија има предност, бидејќи за неа не се користат критични суровини, има подобри својства при ниски температури и може брзо да се полни“, вели истражувачот, кој предвидува дека овие батерии ќе станат уште помоќни и поевтини во иднина.

Истражувачкиот кластер на Универзитетот во Улм не е единствениот кој се занимава со иднината на батериите, пишува tportal. Производителите од приватниот сектор и јавните лаборатории исто така напорно работат на изнаоѓање нови решенија.

„Верувам дека, особено во почетните фази, кога многу работи сѐ уште се многу неизвесни, важно е да се следат синџирите на снабдување, суровините и на тој начин да се идентификува потенцијалот на различни опции“, вели Анегрет Стефан од Институтот Фраунхофер ИСИ во Карлсруе.

Новите типови на батерии сè уште не се толку технолошки зрели

Стефан и нејзиниот тим објавија нова студија за иднината на алтернативните технологии за батерии. Нивната работа јасно покажува дека има многу потенцијал во алтернативните батериски технологии, но нивниот понатамошен развој е неопходен.

Поновите типови на батерии сè уште имаат помала енергетска густина и не се толку технолошки зрели како литиум-јонските верзии што се користат главно во електричните автомобили.

Кога станува збор за избор на акумулатор за електрични автомобили, важни се неколку карактеристики, како што е односот на нејзиниот капацитет со тежината и густината. Затоа, се препорачуваат помалите и полесни батерии, бидејќи ја намалуваат тежината на возилото и на тој начин му овозможуваат подобри перформанси.

„Нашата студија покажува дека некои алтернативни технологии за батерии имаат голем потенцијал, на пример со пониски трошоци или поголема одржливост, но немаат ист опсег на апликации како литиум-јонските батерии“, вели Стефан. Затоа, верува дека литиум-јонските батерии ќе продолжат да доминираат на пазарот. Сепак, тие постепено би можеле да се заменат со алтернативи во одредени области.

 Tехнологијата, клуч за иднината на батериите

Според студијата, новите типови на батерии стануваат поефикасни и еден ден би можеле дури и да ја надминат густината на енергијата на литиум-јонските варијанти, и сето тоа со некритични ресурси.

„На пример, во блиска иднина натриум-јонските батерии може се повеќе да се користат во малите автомобили. Или литиум-сулфурни батерии во помали електрични авиони. Или натриум-сулфур или цинк-јонски батерии во стационарни апликации.

Прво, Стефан ги повикува носителите на политички одлуки да вложат повеќе напори за истражување и развој во Германија и ЕУ. Истражувачите се согласуваат дека технологијата на батерии е клучна за Германија како технолошка сила да биде во чекор со глобалната конкуренција, пишува tportal.