Одењето на работа со велосипед- дополнителен приход за вработените во некои европски земји. Се повеќе држави им плаќаат на своите граѓани да одат на работа со велосипед, нудејќи им за возврат зголемен дел од платата што не се оданочува.
Ова е практика која веќе ја спроведуваат владите на различни земји како Холандија, Белгија, Велика Британија, Данска или Германија.
Во многу случаи, урбаните правци кои превезуваат по едно лице секој ден со автомобил може лесно да се поминат со велосипед, што во градовите со нерамен терен се решава со електричен велосипед.
Оваа практика, која стана сè попопуларна со пандемијата, во некои земји е наградена со економски стимулации.
Практиката за дополнително плаќање за вработените кои одат на работа со велосипед беше иницирана во 2014 година од неколку европски влади со цел да се намали загадувањето на воздухот и потрошувачката на гориво и да се подобри здравјето на луѓето.
Најголем дел од програмите што ги воспоставуваат владите се во форма на даночни олеснувања, така што на вработените им се исплаќа дополнителен износ на основната плата, во форма на неоданочив дел од платата.
Овие програми беа толку успешни што со текот на времето се проширија. Белгија го зголеми даночниот поттик за патување до работа на 0,25 евра по километар. Така, 10-километарскиот пат до работа може да значи дополнителен приход од 1.200 евра годишно. Наградата не ги вклучува здравствените придобивки кои доаѓаат благодарение на секојдневната рекреација во форма на возење велосипед.
Но, Белгија не е единствената што ја нуди оваа поволност. Според Светскиот економски форум, слична програма нуди и Холандија, а Велика Британија оди чекор понатаму.
Британските велосипедисти кои ги користат своите велосипеди на пат до работа добиваат 0,23 евра по километар, а има и стимулативна програма за изнајмување велосипеди, како и можност за купување и попуст на облека и опрема за возење велосипед.
Во случајот со Луксембург, даночното поттикнување е околу 300 евра за купување на електричен велосипед за одење на работа.
