Компанијата Прада се согласи да го купи модниот бренд Версаче за 1,25 милијарди евра. Версаче е во сопственост на модниот конгломерат „Капри Холдингс“.
По неколкумесечни шпекулации за потенцијално спојување на двете италијански модни куќи, договорот доаѓа во време на гласини дека аквизицијата би можела да пропадне по пазарниот пресврт како одговор на тарифите на американскиот претседател.
Упатените велат дека првичната зделка се очекува да биде решена на 1,43 милијарди евра, но постигнат е попуст од околу 180 милиони евра бидејќи неодамнешните превирања на пазарот и трговската несигурност особено тешко ја погодија малопродажната индустрија.
Капри, кој исто така ги поседува Мајкл Корс и Џими Чу, првично го купи Версаче за 2,1 милијарди долари во 2018 година. Капри беше под притисок да го продаде Версаче за да го намали долгот.
Во соопштението кое ја потврди веста, претседателот и извршен директор на Групацијата Прада, Патрисио Бертели вели дека групата е „подготвена и добро позиционирана да напише нова страница во историјата на Версаче“. Бертели додаде дека двете компании „споделуваат силна посветеност на креативноста, изработката и наследството“.
Версаче на тој начин ќе им се придружи на модните брендови Прада и Миу Миу, брендовите за обувки Church's, Car Shoe и Luna Rossa, едриличарскиот тим на Америка Купот Луна Роса и брендот за пециво Марчеси.
Тоа не е прв обид на Прада да го прошири своето портфолио. Во 1999 година Прада ги купи марките Jil Sander и Helmut Lang, а во 2000 година го додаде брендот Alaia во својата групација. Сепак, до 2007 година, по низа спорови и финансиски предизвици, таа се раздели со сите три брендови. Сега стекнувањето на Версаче им нуди уште една можност да го интензивираат глобалниот досег на групата.
Додека пазарот на луксузна мода се соочуваше со значително забавување, групата Прада доживеа редок успех. Во 2024 година оствари приход од 5,4 милијарди евра, што е за 17 отсто повеќе од претходната година. Ова зголемување делумно беше поттикнато од брендот Miu Miu, кој речиси го удвои својот профит оваа година, достигнувајќи близу милијарда евра во продажба.
