По повод 30-годишнината од постоењето на Делта, Мирослав Мишковиќ, кој важи за најбогат Србин, имаше интервју за белградски „Недељник“, за кој откри многу амбициозни регионални планови, но и направи рекапитулација на досегашните успеси на компанијата.
Трите децении на Делта накратко изгледа вака: 24 милијарди евра вкупен приход, 2,5 милијарди евра од деловна продажба и 2,5 милијарди реинвестирани во Србија и земјите од регионот, три милијарди евра уплатени (од 2000 година) во српскиот буџет во име на даноци и придонеси, 35.000 луѓе работеа или работат, 39 милиони евра инвестирани во општествено одговорен бизнис. Што се однесува до минатата година, Делта постигна 10% подобар резултат отколку во 2019 година, и покрај кризата, и имаше EBITDA од 46,5 милиони евра.
- „Без оглед на крајниот резултат, имавме сериозни потешкотии. На пример, изгубивме девет милиони евра во хотелскиот бизнис. Според нашите планови, 2020 година требаше да биде најуспешна во историјата на Делта. Не го постигнавме тоа, но сепак постигнавме многу добар резултат. И 2021 година ќе биде тешка, барем нејзината прва половина од годината, но јас сум оптимист. Во првите шест месеци имаме пет големи инвестиции: ќе отвориме трговски центар во Ниш, канцеларија на Делта Хаус во Нов Белград, ладилник во Заечар, хотел Индиго во центарот на Белград и логистички и дистрибутивен центар во Стара Пазова. Верувам дека ќе ги постигнеме резултатите што ги очекуваме во Делта во втората половина на годината“, вели Мишковиќ за „Недељник“, и дополнува:
- „Големите компании создаваат развој на земјата. Луѓето треба да разберат дека завршив со тоа лично богатство пред 20 години. Денес се занимавам со богатството на моите соработници, моите вработени и богатството на Србија“, вели Мишковиќ и го најави следниот голем потфат.
Во следните години, Делта планира да го продолжи големиот инвестициски циклус, претежно во недвижнини, вреден вкупно околу 500 милиони евра. Новина во 2021 година е влез на компанијата во потполно нов бизнис – онлајн трговија.
- „Оваа година, следејќи ги светските трендови, влеговме во друг голем бизнис - трговија преку Интернет. Тоа е бизнис што го водат Амазон и Алибаба. Новата компанија ќе се вика Ананас и ќе започне во лето, оваа година. Ние ќе инвестираме 100 милиони евра во тој бизнис во следните неколку години. Земаме светски познати експерти од најдобрите компании. Некои од овие луѓе се веќе во Белград. Тие ќе го обучат нашиот најсилен тим што би можеле да го составиме за таа деловна активност. Имаме многу истакнати луѓе од Делта кои се посветени само на овој бизнис и му придаваме големо значење на овој проект“.
Ананас ќе се разликува од се останато тука по исклучително голем асортиман на стоки, соработка со најголемите добавувачи, но и целосно ново корисничко искуство.
- „Со финансиска моќ и инвестициско искуство што го има Делта, убедени сме дека можеме да создадеме регионален гигант во трговијата преку Интернет. Ананас ќе им понуди на клиентите нешто на што не се навикнати во домашната трговија, што го имаат само најголемите глобални трговци како Амазон или АлиЕкспрес. На самиот почеток ќе го покриеме српскиот пазар, но со намера многу скоро да бидеме присутни на пазарите во поранешна Југославија, плус Албанија“ – е се што во оваа фаза откри Мишковиќ на тема регионален Амазон.
