Тојота не се откажува од водородните и моторите со внатрешно согорување. Јапонскиот автомобилски гигант „Тојота“ ќе продолжи да инвестира во развој на неколку различни погонски технологии, и покрај се поочигледниот тренд на доминација на електричните возила, кои во економски развиените земји се очекува во блиска иднина да ги исфрлат од употреба моторите од фосилни горива.

Тојота не се откажува од водородните и моторите со внатрешно согорување

Авто-гигантот „Тојота“ ќе продолжи да ги подобрува возилата со погон на водород, и покрај фактот што, се чини, електричните мотори веќе го преземаа водството во борбата за доминантната еколошка технологија во автомобилската индустрија.

Ова јасно им го соопшти на јапонските медиуми генералниот директор на најголемиот светски производител на автомобили Акио Тојода на прес-конференција одржана по петчасовната трка во градот Хита во префектурата Оита, на островот Кјушу во Јапонија. На трката спортскиот модел на  Тојота корола со експериментален водороден мотор успешно ја помина трасата, натпреварувајќи се рамноправно со возилата со класична погонска единица - бензински мотор со внатрешно согорување.

Интересно е што со ова тркачко возило управувал самиот 65-годишен Тојода, кој не е само менаџер на компанија која произведува околу десет милиони возила на четири тркала годишно, туку и рели возач и медиумски промотор на автомобили.

 Тојота развива различни модели за движење 

Покрај хибридните автомобили кои алтернативно се потпираат на електрична енергија, односно енергија добиена со согорување на бензин, „Тојота“ развива и возила со исклучиво електричен погон. Потоа возила со горивна ќелија (комбиниран погон во кој хемиската енергија се добива со согорување на компресиран водород што се претвора во електрична енергија), како и автомобили со чисто водороден мотор. И мотор со внатрешно согорување во кој горивото е водород наместо бензин, како што е случај со гореспоменатиот експериментален автомобил „Корола“.

Се разбира, „Тојота“ исто така делумно произведува автомобили кои користат како гориво само нафтени деривати, така што во овој момент практично работи на пет производни ленти (бензин, бензин плус електрична енергија, електрична енергија, водород и електрична енергија, самиот водород).

Развојот и производството на неколку различни технологии се екстремно скапи и технички и логистички сложени. Затоа фактот што „Тојота“ се’ уште не се откажува од возилата со единица за гориво и чисто водороден мотор, и покрај експлозивната експанзија на автомобили со исклучиво електричен погон, е доказ за неговата економска моќ и акумулирана експертиза, не само визија за управување.

Заради споредба, се проценува дека до 2020 година, во светот биле продадени речиси седум милиони електрични автомобили, во споредба со нешто повеќе од седум илјади возила со погон на водород.

На прес-конференција по трката за издржливост во префектурата Оита, Акио Тојода, правнук на основачот на бизнис империјата на Тојота, ја повика јапонската влада (финансиски и регулаторно) да го поддржи развојот на автомобили во неколку насоки. Бидејќи, според него се’ уште е неизвесно која од неколкуте нови технологии во оптек ќе биде оптимална, и економски и во еколошка смисла.

https://www.youtube.com/watch?v=2dgzKW8EKMc

Тојота корола со водороден мотор е првото возило од ваков вид во светот што се натпреварува со автомобили со класичен погон. Тоа го направи за прв пат во мај оваа година, кога успешно ја заврши 24-часовната трка од 358 круга на патеката Фуџи Спидвеј во префектурата Шизуока.

Моторот со внатрешно согорување уште не е за фрлање

Предностите на водородниот мотор што ги покрена „експерименталната“ корола на „Тојота“ се засноваат на тоа што испушта само водена пареа во околината, поради што тој е целосно еколошки. Воедно е многу слична по структура со класичен мотор со внатрешно согорување на фосилни горива, којшто со мали модификации, овозможува користење на постоечката инфраструктура за производство и одржување.

Проблемот е како да се дојде до доволно количество на водород без оптоварување на животната средина. Односно како да се избегне еколошката замка што може да се види кај електричните мотори кои сами по себе не ја загадуваат животната средина, туку индиректно, со користење електрична енергија произведена во термоелектрани со висока емисија  на штетни гасови. А исто така и преку рударството за обезбедување литиум и кобалт за акумулатори и батерии значително ја нарушуваат природната средина.

Во врска со ова, Тојода недвосмислено им рече на новинарите за размислувањето на неговата компанија: „Многу луѓе нагласуваат дека треба да се откажеме од моторите со внатрешно согорување, но кога станува збор за елиминирање на емисиите на јаглерод диоксид, вистинскиот непријател не се моторите со внатрешно согорување, туку јаглеродот“.

Тојота не се откажува од водородните и моторите со внатрешно согорување

 

Геотермалната енергија, иднина

Кога станува збор за Јапонија, врвот на „Тојота“ очекува многу од геотермалната енергија, бидејќи таа островска земја има многу природни извори на топла вода и пареа, од кои водородот може да се добие со електролиза.

Возачите кои пробале машини со погон на водород, велат дека моторот добро реагира на зголеменото забрзување и брзо го дава посакуваниот притисок. Според нивниот опис, погонот со водород произведува грмење слично на она што сме навикнати да го слушаме од бензинските мотори, што ги прави попривлечни за љубителите на автомобили и брзо возење од електричните возила.

Што се однесува до трката, недостаток на автомобилите со чисто водороден погон е тоа што тие бараат многу простор за складирање на тој гас, и бидејќи резервоарот е со ограничена големина, тоа во праксата, барем во овој момент значи почесто запирање за полнење отколку кај бензинците.