Денеска е распишан последниот јавен повик од ИПАРД 2 програмата за мерка 3 во вредност од 8,8 милиони евра,велат од Владата. Овие средства се наменети за набавка на опрема, а крајниот рок за поднесување на барања е до 18 септември 2023 година. Финансиските средства по поединечно барање се доделуваат како неповратна помош (грант) во износ од 50 отсто од вредноста на вкупно прифатливите трошоци на инвестициите.

Владата на Република Северна Македонија, заедно со Министерството за земјоделство, шумарство и водостопанство и Агенцијата за финансиска поддршка во земјоделството и руралниот развој упатуваат повик до сите компании од агросекторот како и до земјоделците да ги искористат овие средства со цел подобрување на нивната продуктивност.

Сите надлежни институции стојат на располагање на заинтересираните за пријавување на овој повик со цел да се обезбедат нови инвестиции и нови успеси во агросекторот.

Македонија е лидер во регионот со најголема искористеност од 98 проценти на средства од ИПАРД 2 програмата, со склучени 2.369 договори, но и прва земја во регионот којашто е подготвена да започне со ИПАРД 3 програмата.

 Преку ИПАРД 2 програмата на располагање имавме 60 милиони евра, коишто поради најголемата искористеност од 98 проценти, во ИПАРД 3 програмата се зголемени на нови, неповратни 97 милиони евра за модернизација на македонското земјоделство.

Целта на институциите е сите средства од ИПАРД 2 програмата, да бидат инвестирани дома и со тоа во целост да биде реализирана програмата.

Групите на инвестиции по приоритетни сектори се однесуваат на следниве типови на инвестиции: Млеко и млечни производи; Месо и производи од месо ( вклучувајќи јајца и живина); Овошје и зеленчук (вклучувајќи ги компирите, печурките и легуминозните култури); Житарици, мелнички продукти и скроб; Растителни производи и масла и маснотии од животни; Шира, вино и оцет; Производство на енергија преку погони за преработка и производи од животни од примарната и секундарната биомаса, со исклучок на биомаса од рибни производи“, се истакнува во соопштението.

Повеќе информации за Јавниот повик околу потребните обрасци за поднесување на барања за користење на средства по мерка 3 - Инвестиции во основни средства за преработка и маркетинг на земјоделски и рибни производи, заинтересираните апликанти можат да најдат на веб страната на Агенцијата за финансиска поддршка во земјоделството и руралниот развој: https://www.ipardpa.gov.mk/mk/Home/IpardPovici/29